നിവേദ്യം

എന്നുള്ളിലെന്നുമുണരും പല ചിന്തയെല്ലാം

നന്നായ് കുറുക്കി പല വാക്കിലുമായൊരുക്കി

തോന്നും പ്രകാരമെഴുതുന്നുവിതെന്നുമെന്നാല്‍ -

ചൊല്ലാവതോ, കവിതയെന്നൊരു പേരിതിന്നായ് ?

വാക്കിന്‍ പടുത്വമെഴുമെത്ര മഹാരഥന്മാര്‍

മേളിച്ചിരുന്നൊരുസദസ്സിതുമെന്നുമോര്‍ത്താല്‍

കുട്ടിക്കളിക്കു പലതും പറയാമതെന്നാല്‍

നന്നെന്നു ചൊല്ലുകയെളുപ്പവുമായ് വരില്ലാ

നാവില്‍ കളങ്കമണയാതെവരുന്ന വാക്കും

ചേരും പ്രകാരമെഴുതാന്‍ കഴിവേകിടാനായ്

നിത്യം ഗുരുസ്മരണയായ് ചിലതോതുമെന്നേ

ചൊല്ലാവതുള്ളു ഗുരുവര്യനിതെന്‍ നിവേദ്യം