സ്നേഹം

ഖണ്ഡങ്ങളാക്കീട്ടു സത്യം തിരയുന്ന

മൌഢ്യമേ നീയൊന്നറിഞ്ഞു കൊള്‍ക

നിന്‍ വഴിയ്ക്കില്ല ഞാന്‍ നന്മ തന്‍ മന്ത്രം നിന്‍

നാവിലണയാത്ത കാലത്തോളം

എത്ര മുറിച്ചു നീയെങ്ങു തിരഞ്ഞാലും

കാണില്ല, ഞാനൊരു ഖണ്ഡമല്ല

സത്യമാണെങ്ങും നിറയുന്ന സ്നേഹ-

മാണെന്നെ മുറിച്ചറിയേണ്ടതല്ല

നിന്നില്‍ നിറയുന്ന സ്നേഹപ്രകാശത്തില്‍

ലോകം തെളിഞ്ഞു കാണുന്ന നേരം

മാത്രമേ കാണുവാനാകൂ നിനക്കെന്നെ

നിന്നിലുമെങ്ങും നിറഞ്ഞതായി