പട്ടത്തിനോട്

മാനത്തു പാറിപ്പറക്കുന്ന പട്ടമേ

നൂലിതു ബന്ധനമെന്നോര്‍ത്തിടൊല്ല നീ

കാറ്റത്തു പാറിപ്പറക്കുവാനായ് നിന-

ക്കേകും ബലം ചെറുനൂലിതെന്നോര്‍ക്ക നീ

 

നൂലറ്റു പോവുകില്‍ കാറ്റിന്‍ ഗതിയ്ക്കൊത്തു

പാറിടാം, നീ ചെളിക്കുണ്ടിലും വീണേക്കാം

കാണുന്നതില്ലയെന്നാലുമുണ്ടൊട്ടേറേ

ശോകമേകും ചതിക്കുണ്ടുകളീമണ്ണില്‍

 

കാണാവതായിന്നു വന്നില്ലയെങ്കിലും

കാണാക്കരങ്ങളെ നൂലിതിന്‍ കാണുക

കാറ്റില്‍ ഗതിയ്ക്കൊത്തു പാറിക്കളിയ്ക്കാന-

യ്ക്കുന്ന കാരുണ്യമായിതു കാണുക