ഹുദ് ഹുദിനോട്

അകത്തെഴും പ്രാണനുമെന്നുമേ നീ

ചെവിക്കു നാദം പകരുന്നതും നീ

തകര്‍ ക്കുവാനോങ്ങി വരുന്നതായാല്‍

തടുക്കുവാനാവുകയില്ല നൂനം

 

കടുപ്പമാണെന്‍ പ്രിയ വായുദേവാ

മിടുക്കുകാട്ടുന്നിതുപോലെയാണോ ?

തടുക്കുവാനാവുകയില്ലയെന്നാ-

ലൊടുക്കുവാന്‍ കാരണമായിടാമോ ?

 

മിഴിക്കു കാണാവതുമല്ല നീയെ-

മനസ്സിനാലേയറിവാവതല്ലാ

മടുത്തു പോം മര്‍ത്ത്യനിതേവിധത്തില്‍

തുടങ്ങി നീയെന്നു വരുന്ന പക്ഷം

 

തടുത്തിടാന്‍ ശക്തിയെഴാത്തവര്‍ക്കാ-

യെടുക്കയോ ദുസ്സഹമായ വേഗം ?

മിടുക്കു കാട്ടേണ്ടതു തന്നെയെന്നാ-

ലടുത്തു ചെന്നെത്തിയനുഗ്രഹിക്കൂ