ശിഖരിണി

ലക്ഷണം : യതിക്കാറിൽത്തട്ടും യമനസഭലം ഗം ശിഖരിണീ

0 - - /- - -(യതി) / 000/000-യതി - 0 0/ 0 -

കുലച്ചീടുന്നാരോ, ഗഗനമതിലായ് വില്ലു,മതിനാല്‍

വലഞ്ഞീടുന്നല്ലോ ഭുവനമിതിലേ മര്‍ത്ത്യരഖിലം

മലര്‍ബാണന്‍ വിട്ടാ ശരമണയവേ നോവിലുലയും

മലര്‍ താന്‍ ചിത്തം ഹാ ശരണമരുളൂ ശങ്കര! ഭവാന്‍

 

പിടയ്ക്കും നോവേറ്റാല്‍ മനുജഹൃദയം ശോകഭരിതം

മിടിയ്ക്കും മത് ചിത്തേ വരിക ഭഗവന്‍ ഭക്തി തരണേ

അടുത്തെത്തീടാനായ് മടിയിതു വിഭോ വേണ്ട വെറുതേ

കടാക്ഷത്താല്‍ മോക്ഷം തരണമതിനായ് ശങ്കയരുതേ

 

ഹരന്‍ നല്കീ ദേവീ പകുതിയുടലും, ബാക്കി കവരാന്‍

തിരഞ്ഞെത്തീടുന്നൂ, ഭുവനമിതു പോല്‍ കാണ്മു സതതം

തിരഞ്ഞീടുന്നെന്നില്‍ തെളികയൊളിയായ്, ദ്വൈതമകലാ-

നെരിച്ചീടേണം നീ മനസിയനിശം തിങ്ങിടുമിരുള്‍

തനിച്ചാക്കീടാനോ മധുരതരമായ് പാടി ഭഗവന്‍

മനക്കാമ്പില്‍ പ്രേമം നിറയുവതിനും തന്നു വരവും

നിനയ്ക്കാനാവില്ലാ തവ കൃപ വിനാ ഭൂവിലൊരു നാ-

ളെനിക്കിന്നും വാഴാന്‍ സദയമണയൂ മാനസമിതില്‍

മനസ്സിന്നാവില്ലാ, ഭുവനമഖിലം കാണുമിതു താന്‍

തനിയ്ക്കുള്ളില്‍ നിത്യം തെളിയുമൊളിയാ,ണെന്നതറിയാന്‍

നിനച്ചീടാനാകാ ,പരമകൃപയാല്‍ വിശ്വമിതുപോ-

ലെനിയ്ക്കായെന്നെന്നും തെളിയു,മതു നിന്‍ പ്രേമമറിവൂ

കവര്‍ന്നൂ നീ ദേഹം ഹിമഗിരിസുതേ ബാക്കിയുടലും

കവര്‍ന്നീടുന്നേവം ഹൃദയകമലേ കാണ്മു ശിവനേ

പകര്‍ന്നാടും ജീവന്നറിയുമുലകായുള്ളതഖിലം

തുടര്‍ന്നീടും ലാസ്യം മിഴിയിലമൃതായ് കാണ്മു സതതം

കഴിഞ്ഞല്ലോ കാലം പലതുമിവിടിന്നാരു തിരയാന്‍
കൊഴിഞ്ഞോരോ പൂവും പഴയമലരായ് പിന്നെ വരുമോ
തുഴഞ്ഞീടുന്നൂ ഞാന്‍ കടലിലലയും വഞ്ചി.യതുമി-
ന്നഴല്‍ ക്കാറ്റില്‍ പൊങ്ങുന്നലയിലുലയുന്നെന്നുമറിവൂ

കടക്കണ്ണിന്‍ ബാണം മിഴിയിലണയും നീരുമിവയേ

തടുക്കാനാകില്ലാ, മമ മനവുമാ നോവിലെരിയും
പിടഞ്ഞീടും നേരത്തകമെയറിയുന്നെന്തു,സുഖമോ
മിടിക്കും ചിത്തേ നീ, പറയു കനവെന്താണു നിജവും

പതിഞ്ഞാടും താളം പ്രണയഭരിതം മാനസസുമേ
വിതച്ചീടും മോഹം, കുസുമശരനെയ്യുന്നശരമോ
ചതിക്കുന്നോ കാറ്റും, കുളിരുചൊരിയുന്നിന്ദുകിരണം
പതിക്കും നേരം ഹാ! ഹൃദയമതിലൊന്നാടിയുലയും

വിരിഞ്ഞാടാന്‍ വെമ്പും മലരിലണയും തേന്‍ നുകരുവാന്‍
തിരഞ്ഞെത്തീടുന്നൂ മധുപ,നിതിനോ മാറ്റമിവിടേ
കരിഞ്ഞീടും നേരം ധരയിലണയും പൂവതിനു കൂ-
ട്ടൊരാളും കാണില്ലാ, നിജമിതു മറക്കേണ്ട മനമേ

മനസ്സിന്നാനന്ദം തിരയുമൊരുവന്നെന്തറിവതോ
മനസ്സെന്നും കാണാ,മലകളുയരും സാഗരസമം
മനസ്സല്ലാ,തിന്നും പിറകിലമരും സത്യമതിനേ
നിനച്ചാലേ കാണൂ സുഖ,മിതറിയൂ മര്‍ത്ത്യമനമേ

കരിച്ചെന്തിന്നായാസ്മരനെമിഴിയാലന്നു ഹര! നീ

മരിച്ചില്ലെന്നിട്ടും, ധരയിലവനാടുന്നു സതതം

എരിക്കും മത്ചിത്തം സുമശരനതോര്‍ത്തെന്നു,മതിനാല്‍

സ്മരിച്ചില്ലെന്നാകില്‍ തഴയരുതു, നീ ചേര്‍ക്ക ചരണേ

മനക്കാമ്പില്‍ ക്കാണും കരുണയതു താന്‍ ദൈവ,മറിവാ-
യെനിക്കെന്നും ലോകം തെളിയുവതിനായ് നില്ക്കുമൊളിയും
നിനച്ചീടാമെല്ലാമൊരുപൊരുളു താന്‍ കാണ്മു പലതായ്
ജനിച്ചിട്ടിന്നോളം സദയമിവനേ കാത്ത കനിവും

മനസ്സേ പാടൂ നീ ശബരിമലമേല്‍ വാണു സദയം
നിനച്ചീടും ഭക്തര്‍ക്കഭയമരുളീ ടുന്ന കഥകള്‍
ദിനം തോറും ചിത്തേ തെളിയുമൊളിയായ് കാണുവതിനാ-
യെനിക്കുള്ളില്‍ നീയൊന്നണയുവതിനായ് ദേവ! കനിയൂ

വിറയ്ക്കും കൈ, കാലെ,ന്നടിമുടിയഹോ വേര്‍ത്തു വലയും
പുറത്തെത്തീടില്ലാ മനസിയുണരും വാക്കു പലതും
കുറഞ്ഞില്ലിന്നോളം ഭയമിവിടെയെന്‍ ഹൃത്തടമിതും
പറഞ്ഞീടുന്നേവം സഭയിലെഴുതാനില്ല വരികള്‍

പ്രചോദനം

വേര്‍ക്കും വിയര്‍ക്കും ഹൃദയം വിറയ്ക്കും
മുഖം കെടും വാ വരളും വിശേഷാത്
പുറപ്പെടാ വാക്കു സഭാപ്രഭാവാത്
എനിക്കു ചൊല്ലാനരുതേ ശിലോകം