കാരുണ്യം

കണ്ണുനീരേറെക്കണ്ണില്‍ വന്നോരു കാലത്തു ഞാ-

നാരാഞ്ഞു "നോവെന്തേ നീ നല്കുന്നതെനിയ്ക്കെന്നും "

കാരണം ചൊല്ലാനവന്‍ വന്നുവെന്നുള്ളിലപ്പോള്‍

കാണാതെ കാണുന്നതാം കാരുണ്യമല്ലേയവന്‍

കാരണം നിന്നോടുള്ള സ്നേഹമാണെന്നോതിയ-

ക്കണ്ണനന്നേരം തന്നെ മാഞ്ഞുപോയുള്ളിലെങ്ങോ

കണ്ണുനീര്‍ തിങ്ങി നോവും കണ്ണിനേ കാണാനാവൂ

അന്യന്റെ കണ്ണീരെന്നുമോതിയതാകാമവന്‍

കാണൂക നിന്‍ കണ്ണീരിലന്യന്റെ നോവെന്നോതും

ഗൂഢമാം മന്ദസ്മേരമോര്‍ പ്പൂ ഞാനാചുണ്ടിലായ്

അന്യന്റെ കണ്ണുനീരില്‍ നോവാത്ത കാലത്തോളം

കാണുവാനാകില്ലെന്നെയെന്നു ചൊല്കയുമാകാം