കണ്ണന്‍

കണ്ണാലെ കാണില്ലയെങ്കിലും കണ്ണാ നീ-
യെന്നിലെയുള്‍ക്കണ്ണുതന്നെയല്ലെ

കാതാലെ കേള്‍പ്പതില്ലെങ്കിലും പ്രാണന്റെ-
യാദ്യന്തസ്പന്ദം നീ തന്നെയല്ലെ

കൈയ്യാലെതൊട്ടറിയാന്‍ വയ്യെനിയ്ക്കെന്നാല്‍
കൈയ്യിന്‍ കരുത്തു നീ തന്നെയല്ലെ

വര്‍ണ്ണിയ്ക്കാനാവില്ലെന്‍ നാവിനെന്നാലുമെന്‍
മൊഴിയാവതെന്നും നീ തന്നെയല്ലെ

എങ്ങും നിറഞ്ഞു നീയെന്നില്‍ നിറഞ്ഞു നീ-
യെന്‍ പ്രാണനായ് നില്‍പുണ്ടെന്നാകിലും

എന്തിനായെന്നുമേ കാണാമറയ്ക്കുള്ളില്‍
ഞാനറിയാതെയൊളിച്ചിരുന്നൂ?