അവന്‍

ചാരത്തണഞ്ഞെന്നെത്തൊട്ടുണര്‍ത്തുന്നവന്‍ 
ദൂരേയ്ക്കകന്നെന്നില്‍ നോവുപകര്‍ന്നവന്‍ 
ദൂരയെല്ലേറ്റമരികത്തിരുന്നിട്ടും 
കാണുവാനാകാതെതന്നെമറപ്പവന്‍ 

കണ്ണിനും കണ്ണായിട്ടെന്നിലിരിപ്പവന്‍ 
കാണാത്തകാരുണ്യരൂപനായുള്ളവന്‍ 
കണ്ണിലെ കണ്ണുനീരായുമിരിപ്പവന്‍ 
കണ്ണുനീരൊപ്പുമാകൈയ്യുമവനല്ലോ

പുഞ്ചിരിതൂകുന്നസാന്ത്വനമാണവന്‍ 
നെഞ്ചകം തേടുന്നസ്നേഹത്തിടമ്പവന്‍ 
കൊഞ്ചുന്നപൈതലില്‍ സൌന്ദര്യമാര്‍ന്നവന്‍ 
പഞ്ചബാണോപമപ്രേമസ്വരൂപനും 

കാര്‍മുകില്‍ കാണുമ്പോളാടും മയിലുപോ-
ലാടുമെന്‍ മാനസം കാണുന്നവനവന്‍ 
ആടുമെന്‍ മാനസമാടുന്നതിന്നൊപ്പം 
ആടുന്നകേവലാനന്ദസ്വരൂപനാം