മനസ്സിനോട്

ആരു നീ ചൊല്കെടോ മാനസമേ, യെന്റെ

ശത്രുവോ മിത്രമോ ബന്ധുവോ മായയോ

നിത്യമലകടല്‍ പോലെയിതെന്തെടോ

ശാന്തിയറ്റിങ്ങിനെ കാണുവതാകുന്നു

കാണുന്ന കാഴ്ചയില്‍ മോഹം വളര്‍ത്തിയി-

ട്ടെന്നെ നോവിക്കുവാന്‍ കാരണമെന്തെടോ

നോവെത്ര തന്നുവെന്നാലും നിന്നെ ഞാന്‍

നമ്പുവാന്‍ കാരണമെന്താണറിവീല

കാട്ടുന്ന മായികക്കാഴ്ചയില്‍ ഞാനെന്റെ

സത്യപ്രകാശത്തെയെന്തേ മറന്നു പോയ്

തെല്ലൊന്നടക്കു നിന്‍ ചിന്തയാകും തിര,

യൊന്നു കണ്ടോട്ടെ ഞാനാത്മപ്രകാശത്തെ